रातो टिसर्ट र कालो स्कर्टमा देखिएकी तेरिया मन्द मुस्कानसहित मञ्चमा पुग्दा दर्शकदीर्घाबाट उत्साहित हुँदै 'हुटिङ' गरेका थिए।
यति छिट्टै छोरीको प्रगति देख्न पाइएला भन्ने नसोचेकी तेरियाकी आमा अनिता फौजामगरले काठमाडौंमा गरिएको सम्मान देखेपछि खुसीको सीमा नाघेको अनुभव सुनाइन्। 'तेरियाले नेपालको छाती ठूलो बनाएकी छन्। हाम्रो शिर सगरमाथाजस्तै उच्च भएको छ। भविष्यमा पनि विश्वभरका नेपालीले यसरी नै माया गरून्', उनले भनिन्।
आफूले कुनै समय हिम्मत हारे पनि छोरीले कहिल्यै हिम्मत नहारेकाले जित हासिल भएको उनले बताइन्। यति भव्य सम्मानको कल्पना नगरेकी अनिताले भनिन्, 'नेपालीको साथ त भोट हेरेरै थाहा पाएकी थिएँ तर तेरिया कति फेमस रहिछन् भनेर त यहाँ आएर पो थाहा भयो।'
नातिनीको जितमा खुशी हजुरबुवा कृष्णबहादुर फौजामगरले तेरियाको जीवनबारे जानकारी गराएपछि भने, 'मेरी नातिनी अब नेपालकी नातिनी हुन्, मेरोमात्र होइन।' संविधानसभाका उपसभामुख ओनसरी घर्तीमगरले तेरियालाई खादा पहिर्याएर गालामा म्वाइँ खाइन्।
तेरिया भीडमा पनि मुस्कुराइरहेकी थिइन्। बेलाबेलामा छेउमा बसेकी आमासँग के के सोधिरहन्थिन्। तस्बिर खिचाउन चाहनेहरू नजिक आउनासाथ कहिले हाँसेर मुन्टो बंग्याउँथिन् त कहिले दुई औंला देखाएर पोज दिन्थिन्। सम्मान कार्यक्रममा उनीसँग उनका नेपालका गुरु दीपेश गुरुङ र डीआईडीमा नृत्य सिकाउने गुरु ओमकार पनि सरिक थिए। तेरिया फौजामगर स्वागत, बधाई तथा सम्मान मूल समारोह समितिले कार्यक्रम आयोजना गरेको हो।
0 comments:
Post a Comment